Конкурс праходзіць у чатыры туры. Кожны тур доўжыцца чатыры тыдні з моманту абвяшчэння задання. Заданне складаецца з трох вершаваных загадак, адказ – малюнак адпаведнай істоты (жывёлы, птушкі, паўзуна) з подпісам: хто намаляваны, аўтар малюнка. Адказы дасылаюцца поштай ці электроннай поштай. Удзельнікам неабходна паведаміць пра сябе: імя, прозвішча, адрас (для дастаўкі прызоў і падарункаў) і кантактны тэлефон (адрас электроннай пошты), школу і клас (садок). Пажадана прыслаць кароткі расповед пра сябе і свае захапленні. Асабістыя дадзеныя публікавацца не будуць (апроч выпадкаў, калі дазваляюць бацькі аўтара). Конкурс з’яўляецца некамерцыйнай прыватнай ініцыятывай дзеля пашырэня ўжывання беларускай мовы дзецьмі і іх бацькамі, развіцця творчага патэнцыялу дзяцей. Па заканчэнні тэрміну адразу ж абвяшчаюцца заданні наступнага тура. Праз 2 тыдні па заканчэнні тура падводзяцца вынікі. Вынікі падводзяцца асобна ва ўзроставых катэгорыях “дашкольнікі і першакласнікі” і “вучні пачатковай школы (2-4 класы)”. Прызы чакаюць: - самых актыўных удзельнікаў (тых, хто прыслаў адпаведныя адказы на ўсе 12 загадак); - аўтараў 12 найцікавейшых работ (па адным малюнку на кожную загадку). Афіцыйны старт конкурсу – 16 жніўня. Першы тур: пачатак – 16 жніўня 2010, апошні дзень высылкі малюнкаў-адгадак – 12 верасня. Падвядзенне вынікаў 1 тура – да 26 верасня. Другі тур: пачатак - 13 верасня, апошні дзень высылкі малюнкаў – 11кастрычніка, вынікі 24 верасня. Трэці тур: пачатак 11 кастрычніка, апошні дзень 8 лістапада, вынікі 22 лістапада. Апошні тур: пачатак 8 лістапада, заканчэнне конкурсу 6 снежня. Падвядзенне вынікаў усяго конкурсу – напярэдадні калядаў. Малюнкі высылаць поштай на адрас 220004, Мінск, вул.Заслаўская, 11-1-131 , Алене Церашковай, Альбо ў фармаце jpeg на электронны адрас lenka1st@yahoo.com . 1. Паглядзіце: гэта птушка Ці гарэзлівая мушка? Тонкі востранькі насок П’е нектар, бы хабаток. Дробных мошак паядае І расліны апыляе. Можа, быццам верталёты, Хвосцікам наперад лётаць. А з-за дробнага калібру Клічуць птушачку - ???

  1. Над высокаю травой Бачым шыю з галавой. Шыя гэткая даўгая Да вяршыняў дрэў сягае, Але цяжка нахіліцца З ручая вады напіцца. Ў тры разы вышэй за шафу Афрыканская - ???

  2. У Амерыцы Паўднёвай Звер знайшоўся адмысловы. Гэты звер – без лішніх слоў – Рэкардсмэн між грызуноў. Да марской падобны свінкі, Важыць з добрую дзяўчынку, Каля рэчкі ён жыве Ў сакаўной густой траве І хаваецца ў ваду, Як пачуе дзе бяду. Перапончатыя лапы, Моцныя тупыя драпы, Філасофскі выраз твару. А завецца - ???

Запрашаю да супрацы!